kabilang buhay

I

At natupad ang ibig.
Sa paghudyat ng ika-siyam na oras
sumuko ang kaluluwa: Tapos na!

II

Nagpista ang mga eksperto nang ilatag ang ebidensiya:
Lumapat nang mainam ang kasaysayan sa tela
Nang masuyong pahiran ng langis ang napagal na katawan -
Gumuhit ang mukha ng biktima
Nang silipin sa negatibo ang telang lino.
Malinaw ang marka ng balbas, ng mahabang buhok
Ang hugis ng ilong, ng bibig, ng mata, itong bawat kanto at kurba.

Mubusisi ang proseso:
Binilang ang mga bakas ng parusa na naniin sa hibla:
May dugong galing sa ulo dahil sa tinik na ipinutong.
Duguan ang kamay at paa sa mga pakong bumaon
May mga latay sa likod sa malupit na hagupit
Nagsugat ang balikat sa bigat na binuhat,
Pati kanang tadyang lumuha ng awa nang tinusok na sadya.

Ang resulta ng awtopsiya:
Nang minsang mauhaw ay pinainom ng sukang pampatulog lamang
At pampagaling naman ng sugat ang mga dahong itinapal.
Buhay ang bikitma nang balutin ng tela
Dahil ang dugo’y hindi aagos kung katawa’y patay na!
Bakit pinunasan lang ng langis at di hinugasan ang katawan
Gayong ganito ang banal na ritwal?

III

At ito ang pag-ibig –
Natubos ang sala ng daigdig
Sa hiwaga ng libing na kinasihan ng langit.